NIJS 15-03-2015
Wurkbesite FNP Noard East oan Damstra
In FNP- delegaasje fan
riedsleden, wethâlders en kandidaat- steateleden wie freed 13 maart op wurkbesite by
Damstra yn Driezum. Opfallend yn it logo fan Damstra is it pompeblêdsje;
it ferwiist nei de bân dy't it bedriuw hat mei Fryslân; in lokaal Frysk
bedriuw mei lanlike útstrieling.
Nei it oandacht sloarpjende
wynmûneferhaal waard it de heechste tiid om nei alternative techniken te
sjen as it giet om duorsume enerzjy. Yn Noardeast Fryslân ha we in
bedriuw, dy't harren dwaande hâldt mei de engineering en levering fan
ynnovative ynstallaasjetechniken. Damstra docht mei oan in
koprinnersprojekt yn de gemeente Dantumadiel, wêrby de gemeente tegearre
mei bedriuwen sjen lit dat duorsume enerzjy net allinne nedich mar ek
leanend is.
Der wie in tige gastfrije ûntfangst troch de bruorren
Damstra mei in nijsgjirrige presintaasje fan harren bedriuw. Yn mear as
100 jier hat it bedriuw harren breed spesjalisearre en ûntwikkele foar
bedriuwen en partikulieren. Waarmteweromwinning (WTW-systeem),
waarmtekrêftkeppelingen, regeltechniken, wetterynstallaasjes, PV
panielen/sinnepanielen, elektronikatechnyk ensafuorthinne. In bedriuw
wêr de útdaging om te ynnovearjen te priuwen is.
Damstra is oansletten
by DuTeF, in netwurk fan gearwurkjende Fryske ynstallateurs mei ferstân
fan duorsume enerzjy. Damstra hat rom 100 meiwurkers yn tsjinst en is
dêrtroch ien fan de grutte wurkjouwers yn Dantumadiel. Op de iepen dei
fan 18 april o.s. kin eltsenien it allegearre sels bewûnderje en harren
ynformearje litte oer ferskillende duorsume enerzjytapassings.
Tags:
Algemien
MEAR OER DIT ÛNDERWERP
Frysk 
Nederlands