Moandeitejûn 2 novimber hat yn in mienskiplike
fraksjegearkomst fan CDA Dongeradeel en FNP Dongeradiel bliken dien dat der in
betrouwensbrek is tusken CDA en FNP oan de iene kant en de Kristen Uny oan de
oare kant. It betrouwen is ûnherstelber beskeadige, nei oanlieding fan it net
neikommen fan in koalysjeôfspraak oer keapsneinen troch de Kristen Uny.
Tidens de gearkomst fan de gemeenteried op 29 oktober makke de Kristen Uny in
draai en stimde tsjin it kolleezjefoarstel dat útfiering jaan moast oan it
Koalysjeakkoart. Yn dat troch alle 3 koalysjepartijen ûndertekene akkoart wurdt
in beheind tal keapsneinen mooglik makke.
Foarich jier stimde de Kristen Uny noch yn mei it kolleezjefoarstel foar de proef
ta ynfiering fan keapsneinen. Troch wjerstân binnen dy partij besleat se yn
ôfwiking fan it koalysjeakkoart tsjin de definitive ynfiering te stimmen. It
CDA en de FNP hawwe begryp foar de prinsipiële opfettings fan de partij en
hawwe romte jûn foar in tsjinstim fan de Kristen Uny. Wol is de Kristen Uny
faak frege om in earlike útlis te jaan oer de redenen fan de wiziging fan
harren stânpunt. Dat kaam der net yn de riedsgearkomst fan tongersdei.
It betrouwen is earnstich skansearre en koe yn de ôfrûne dagen net sa hersteld
wurde dat fierder gearwurking mooglik is. Dêrmei is spitigernôch in ein kaam
oan de gearwurking.
De kommende dagen sille CDA en FNP mei de oare fraksjefoarsitters oerlis hawwe
oer de ûntsteane sitewaasje.
Frysk 
Nederlands